சமையல் காண்ட்ராக்டர் கொலை : கோவை தனிப்படை போலீஸ் தீவிர விசாரணை

சமையல் காண்ட்ராக்டர் கொலை : கோவை தனிப்படை போலீஸ் தீவிர விசாரணை

published 1 year ago

கோவை:

கோவை ரேஸ்கோர்சில் சமையல் காண்டிராக்டர் கொலை செய்யப்பட்ட வழக்கில் குற்றவாளியை பிடிக்க தனிப்படை போலீசார் தீவிரமாக தேடி வருகின்றனர்.

கோவை மாவட்டம் வால்பாறை காந்திநகரை சேர்ந்தவர் கோபாலகிருஷ்ணன் மகன் ராஜேஷ்(40). இவர் குடும்பத்தினரை பிரிந்து கடந்த 10 ஆண்டுகளாக கோவையில் வசித்து வந்தார். சமையல் வேலைக்கு சென்று வந்த அவர் நேரு ஸ்டேடியம் அருகே பிளாட்பாரத்தில் தங்கினார்.
இந்நிலையில், கடந்த ஒரு வாரத்திற்கு முன்பு சமையல் காண்டிராக்ட் தொழிலை காட்டூர் பார்க் தெருவை சேர்ந்த மணிவண்ணன்(38) என்பவருடன் இணைந்து மேற்கொண்டார். கடந்த 3 நாட்களுக்கு முன்பு சூலூரில் நடைபெற்ற திருமண விழாவில் சமையல் காண்டிராக்ட் எடுத்து செய்து கொடுத்தனர்.

இதற்கிடையே ஆடிஸ் வீதியில் உள்ள பெட்டிக்கடை முன்பு நேற்று முன்தினம் இரவு ராஜேஷ் கொலை செய்யப்பட்டு கிடந்தார். சம்பவ இடத்துக்கு வந்த ரேஸ்கோர்ஸ் போலீசார் அவரது உடலை மீட்டு கோவை அரசு மருத்துவமனைக்கு அனுப்பி வைத்தனர். ரேஸ்கோர்ஸ் போலீசார் மேற்கொண்ட விசாரணையில், கொலை செய்யப்பட்ட ராஜேசுக்கும், பிளாட்பாரத்தில் தங்கி சப்ளையராக வேலை பார்த்து வந்த கேரளாவை சேர்ந்த பென்னி(36), என்பவருக்கும் இடையே சம்பவத்தன்று இரவு தகராறு ஏற்பட்டுள்ளது. அப்போது இருவரும் குடிபோதையில் இருந்ததாக கூறப்படுகிறது. இதில், பென்னி, ராஜேசையும், அவரது குடும்பத்தாரை பற்றியும் அவதூறாக பேசியுள்ளார்

. இதனால் அவர்களுக்கிடையே கடும் வாக்குவாதம் ஏற்பட்டதில் ஆத்திரமடைந்த பென்னி கீழே கிடந்த உருட்டுக்கட்டையால் ராஜேசை தாக்கி கொலை செய்தது தெரியவந்தது. இதனை தொடர்ந்து போலீஸ் கமிஷனர் பாலகிருஷ்ணன் உத்தரவின் பேரில், தனிப்படை அமைக்கப்பட்டது.

தனிப்படை போலீசார் கொலை நடந்த இடம், உப்பிலிபாளையம் சிக்னல் உள்ளிட்ட பகுதிகளில் உள்ள சிசிடிவி கேமரா காட்சிகளை கைப்பற்றி ஆய்வு செய்தனர். அதில், பென்னி கேரளாவுக்கு தப்பி சென்றிருக்கலாம் என தெரிகிறது. இதனையடுத்து தலைமறைவான பென்னியை தனிப்படை போலீசார் தீவிரமாக தேடி வருகின்றனர்.