காந்திபுரத்தில் இனி சிக்னலில் நிற்கவேண்டாம்...!

காந்திபுரத்தில் இனி சிக்னலில் நிற்கவேண்டாம்...!

published 1 year ago

காந்திபுரத்தில் இனி சிக்னலில் நிற்கவேண்டாம்...!

கோவை: கோவை,

காந்திபுரம் சித்தி விநாயகர் கோவில் முன்பிருந்த போக்குவரத்து சிக்னல் அகற்றப்பட்டது. வாகனங்கள் நிற்காமல் செல்லும் வகையில், மாற்றம் செய்யப்பட்டுள்ளது.

கோவை மாநகரில் சிக்னல்கள் மூலம் போக்குவரத்து ஒழுங்கு செய்யப்படும் இடங்கள் அனைத்தையும், போலீசாரும், நெடுஞ்சாலைத்துறையினரும் ஆய்வு செய்து, தேவையான மாற்றங்களை செய்து வருகின்றனர்.

அவிநாசி சாலையில் இருந்த பெரும்பாலான சிக்னல்கள் அகற்றப்பட்டு விட்டன. வாகன ஓட்டிகள், 'யூ டர்ன்' மூலம் சுற்றிச் செல்வதற்கு வழி செய்யப்பட்டுள்ளது. இதன் மூலம், மெதுவாக சென்றாலும், போக்குவரத்து நெரிசல் இன்றி, வாகனங்கள் செல்வதற்கு ஏற்பாடு செய்யப்பட்டுள்ளது.

இதன் தொடர்ச்சியாக, காந்திபுரம் சித்தி விநாயகர் கோவில் முன்பிருந்த சிக்னல் அகற்றப்பட்டுள்ளது. இந்த சிக்னலை, டாக்டர் நஞ்சப்பா ரோட்டில் இருந்தும், சத்தி ரோட்டில் இருந்தும், பாரதியார் ரோட்டில் இருந்தும் வரும் வாகனங்கள் கடந்து செல்கின்றன.எந்த நேரமும் பரபரப்பாக இருக்கும் இந்த சிக்னலை ஆய்வு செய்த போக்குவரத்து துணை கமிஷனர் மதிவாணன், நெடுஞ்சாலைத்துறை கோட்ட பொறியாளர் (சாலை பாதுகாப்பு) மனுநீதி ஆகியோர், வாகனங்கள் நிற்காமல் செல்லும் வகையில், 'பேரிகார்டு' வைத்து மாற்றங்களை செய்தனர்.

* சத்தி ரோடு, பாரதியார் ரோட்டில் இருந்து வரும் வாகனங்கள், கிராஸ்கட் ரோட்டுக்குச் செல்வதற்கு, டாக்டர் நஞ்சப்பா ரோட்டில் சிறிது துாரம் சென்று, 'யூ டர்ன்' போட்டுச் செல்ல வேண்டும்.

* டாக்டர் நஞ்சப்பா ரோட்டில் இருந்து வரும் வாகனங்கள், பாரதியார் ரோட்டுக்குச் செல்ல வேண்டுமெனில், சத்தி ரோட்டில் சிறிது துாரம் சென்று, 'யூ டர்ன்' போட்டு வர வேண்டும்.

* பாரதியார் ரோட்டில் இருந்து சத்தி ரோட்டுக்கு நேரடியாக வலது புறம் திரும்பிச் செல்லவும் வழி செய்யப்பட்டுள்ளது. இம்மாற்றங்களுக்கு தகுந்தபடி, சாலையில் 'பேரிகார்டு'கள் வைக்கப்பட்டுள்ளன. போக்குவரத்து போலீசார், வாகன ஓட்டிகளுக்கு வழிகாட்டி வருகின்றனர்.