இது ஆன்மீகத்திற்கு எதிரான ஆட்சி அல்ல - கோவையில் அமைச்சர் சேகர்பாபு பேச்சு

இது ஆன்மீகத்திற்கு எதிரான ஆட்சி அல்ல - கோவையில் அமைச்சர் சேகர்பாபு பேச்சு

published 1 year ago

இது ஆன்மீகத்திற்கு எதிரான ஆட்சி அல்ல - கோவையில் அமைச்சர் சேகர்பாபு பேச்சு

கோவை: இந்த ஆட்சி ஆன்மீகத்திற்கு எதிரான ஆட்சி அல்ல ஆன்மீகவாதிகளை இருகரம் கொண்டு அரவணைக்கின்ற ஆட்சி என்று கோவையில் அமைச்சர் சேகர்பாபு உரையாற்றினார்.

கோவை பேரூர் பகுதியில் நடைபெற்ற வரும் நொய்யல் திருவிழாவின் மூன்றாம் நாள் நிகழ்வில் தமிழ்நாடு இந்து சமய அறநிலையத்துறை அமைச்சர் சேகர்பாபு கலந்து கொண்டார். இந்நிகழ்வில் விழா பேருரை ஆற்றிய அமைச்சர்,

நாட்டு நலன் மீது அக்கறை கொண்ட ஆதீனம் பேரூர் ஆதீனம் என்றால் அது மிகையாகாது என்பது என்னுடைய கருத்து எனவும், எளிமையான முறையில் இறைவனை வழிபடுவது இவர்களது தொண்டு எனவும் தெரிவித்தார்.

அன்னை தமிழில் குடமுழுக்கு என்றால் வரவேற்கின்றோம், அன்னை தமிழில் அர்ச்சனை என்றால் வரவேற்கின்றோம், அனைத்து ஜாதியினரும் அர்ச்சகரா நாங்கள் வரவேற்கின்றோம், தமிழை வாழவைக்கின்ற சன்னிதானம் உண்டென்றால் பேரூர் சன்னிதானம் என்று கூறினால் அது மிகையாகாது எனவும் கூறினார்.

மடங்கள் என்பவை சமய பணியோடு நின்று விடாமல் சமுதாயப் பணிகள் மேற்கொள்கின்ற உதாரண புருஷனாக திகழ்பவர் பேரூர் சாமி என்றால் மிகை ஆகாது என்றும் புகழ்ந்தார். இந்நிகழ்ச்சி நொய்யல் ஆற்றை காப்பாற்றுகின்ற நிகழ்ச்சியோடு மட்டுமில்லாமல், தண்ணீர் என்பது மனிதனின் உயிரோடு கலந்த ஒன்று, நீரின்றி அமையாது உலகு என்ற மாணிக்க வரிகளுக்கு ஏற்ப நதிநீரைக் காப்பாற்ற புறப்பட்டிருக்கும் பேரூர் ஆதீனத்தின் இப்பணி சிறப்பதற்கு இந்து சமய அறநிலையத்துறையின் சார்பில் எனது வாழ்த்துக்களை தெரிவித்துக் கொள்கிறேன் என்றார்.

மடங்கள் வெறும் வழிபாடு நடத்துகின்ற இடங்களோடு மட்டும் அல்லாமல் வாழ்க்கைக்கு தேவையான அனைத்தையும் பாதுகாக்கின்ற இடமாக விளங்குகின்றன என தெரிவித்தார். இறைவன் இயற்கை மயமானவர் என்பதால் இயற்கையை சார்ந்த பாதுகாப்புகளில் ஆதீனங்களின் சேவையில் இந்த நொய்யல் நீர் நதி பாதுகாப்பும் ஒன்றாக அமைந்துள்ளது.