கோடை விடுமுறைக்கு 'குட்-பை' : பள்ளிக்குப் புறப்பட்ட கோவை மாணவர்கள்..!

கோடை விடுமுறைக்கு 'குட்-பை' : பள்ளிக்குப் புறப்பட்ட கோவை மாணவர்கள்..!

published 1 year ago

கோடை விடுமுறைக்கு 'குட்-பை' : பள்ளிக்குப் புறப்பட்ட கோவை மாணவர்கள்..!

கோவை: கோடை

விடுமுறைக்குப் பின்னர் கோவை மாவட்டத்தில் 6 முதல் 12"ம் வகுப்புகளுக்குப் பள்ளிகள் இன்று திறக்கப்பட்டன. மாணவர்கள் உற்சாகத்துடன் பள்ளிகளுக்குச் சென்றனர்.

தமிழகத்தில் அனைத்து பள்ளிகளுக்கும் கடந்த ஏப்ரல் மாதம் 29-ந்தேதி முதல் கோடை விடுமுறை விடப்பட்டது. விடுமுறை முடிந்து 6-ம் வகுப்பு முதல் 12-ம் வகுப்புகளுக்கு ஜூன் 1"ந்தேதியும், 1-ம் வகுப்பு முதல் 5-ம் வகுப்புகளுக்கு ஜூன் 5-ந்தேதியும் பள்ளிகள் திறக்கப்படும் என்று தமிழக அரசு ஏற்கெனவே அறிவித்து இருந்தது.

ஆனால் பள்ளிகள் திறக்கும் நேரத்தில் தமிழகம் முழுவதும் கோடை வெயிலின் தாக்கம் அதிகமாகக் காணப்பட்டது. குறிப்பாக அக்னி நட்சத்திரம் எனப்படும் கத்தரி வெயில் மே மாதத்தில் முடிந்த பிறகும் வெயிலின் தாக்கம் குறையவில்லை. மாறாக அதற்கு பிறகுதான் வெயில் அதிகமாகக் கொளுத்த தொடங்கியது.

தமிழகத்தில் பல மாவட்டங்களில் தொடர்ந்து 100 டிகிரியை தாண்டி வெயில் கொளுத்தியது. எனவே பள்ளிகள் திறப்பை ஜூன் 7"தேதிக்குத் தள்ளி வைப்பதாக அமைச்சர் அன்பில் மகேஷ் பொய்யாமொழி அறிவித்தார்.

ஆனாலும் பல்வேறு மாவட்டங்களில் வெயிலின் தாக்கம் தொடர்ந்து நீடித்தது. எனவே பள்ளிகள் திறக்கப்படுவதை மேலும் தள்ளி வைக்குமாறு பெற்றோர்கள் மற்றும் கல்வியாளர்கள் தரப்பில் கோரிக்கை வைக்கப்பட்டது.

இதையடுத்து முதலமைச்சர் மு.க.ஸ்டாலின் அறிவுறுத்தலின் பேரில் பள்ளிகள் திறக்கப்படுவது 2-வது முறையாக மீண்டும் தள்ளி வைக்கப்பட்டது. இந்நிலையில் நடப்பு கல்வியாண்டில் 6-ம் வகுப்பு முதல் 12-ம் வகுப்புகளுக்கு இன்றும் , 1 முதல் 5-ம் வகுப்புகளுக்கு வருகிற 14-ந்தேதியும் பள்ளிகள் திறக்கப்படும் என்று அறிவிக்கப்பட்டது.

அதன்படி 6-ம் வகுப்பு முதல் 12-ம் வகுப்பு மாணவர்களுக்கு இன்று பள்ளிகள் திறக்கப்பட்டன. இதற்காக அனைத்து பள்ளிகளிலும் தூய்மை பணிகள் செய்து முடிக்கப்பட்டு பள்ளிகளை திறப்பதற்கான முன்னேற்பாடுகளும் செய்யப்பட்டன.

தொடர்ந்து மாணவர்கள் இன்று உற்சாகத்துடன் பள்ளிக்குப் புறப்பட்டனர். நீண்ட நாட்களுக்கு பின் பள்ளி நண்பர்களைச் சந்தித்த மகிழ்ச்சியில் ஒருவருக்கு ஒருவர் ஆரத்தழுவி தங்களது மகிழ்ச்சியை வெளிப்படுத்தினர்.

அரசு பள்ளிகளில் இன்று முதல் மாணவர்களுக்குப் பாடநூல்கள், நோட்டு - புத்தகங்கள், சீருடைகள், காலணிகள் உள்ளிட்ட இலவச நலத்திட்டப் பொருட்கள் வழங்கப்பட உள்ளது குறிப்பிடத்தக்கது.