ஆளுநர் ஆளுநராக பணியாற்றினால் அனைவருக்கும் சிறப்பு- கோவையில் அமைச்சர் ஏ.வ.வேலு பேட்டி...

தொடர்ந்து செய்தியாளர்களை சந்தித்த அவர் முதலமைச்சர் கோவையில் நூலகம் அமைக்கப்பட வேண்டும் என்று அறிவித்ததை தொடர்ந்து முதல்வரால் அடிக்கல் நாட்டப்பட்டு பணிகள் துவங்கப்பட்டது, 2026 ஆம் ஆண்டு ஜனவரி மாதம் இந்த நூலகம் திறக்கப்படும் என்று முதல்வர் அறிவித்ததன் படி இலக்கு அமைத்து பொதுப்பணித்துறை சார்பில் பணிகள் நடைபெற்று வருவதாக தெரிவித்தார்.

300 கோடி ரூபாய் மதிப்பில் கட்டப்பட்டு வரும் இந்த நூலகத்தில் கட்டிடம் மட்டும் 250 கோடி ரூபாய் என்றும் 45 கோடி ரூபாய் மதிப்பில் புத்தகங்கள் 5 கோடி ரூபாய்க்கு விஞ்ஞானம் சம்பந்தப்பட்ட கணினிகள் என்பதன் அடிப்படையில் பணிகள் நடைபெற்று வருவதாக தெரிவித்தார். தரைத்தளம் அல்லாமல் ஏழு தளங்கள் கொண்ட கட்டிடமாக இந்த கட்டிடம் அமைக்கப்பட்டு வருவதாகவும் ஏறத்தாழ ஒரு லட்சம் புத்தகங்கள் வைப்பதற்கு வாய்ப்பு உள்ளதாகவும் கூறிய அவர் நான்கு இடங்களில் லிப்ட் வசதி, முதல் இரண்டு தளங்களுக்கு எக்ஸ்கலேட்டர் வசதி, வாகனம் நிறுத்தும் வசதி என பல்வேறு வசதிகள் செய்யப்படும் என தெரிவித்தார்.

மண்டல தலைமை பொறியாளர் தொடர்ந்து பணிகளை கண்காணித்து வருவதாகவும் மாதம் மாதம் ஆய்வுகள் மேற்கொள்ளப்படும் என தெரிவித்தார். மேலும் மண் பரிசோதனை, நீர் பரிசோதனை, சிமெண்ட் கம்பிகளின் தரம், மணல் அல்லது எம் சாண்ட் ஆகியவை ஆய்வு செய்வதற்கு ஆய்வகமும் அமைக்கப்பட்டுள்ளதாக கூறினார். மேலும் அனைத்தும் முறையாக  ஆய்வு செய்யப்பட்டுள்ளதாகவும் அதற்கான ஆவணங்கள் தங்களிடம் இருப்பதாகவும் தெரிவித்தார்.

பணியாளர்கள் பாதுகாப்பிற்கு திராவிட மாடல் ஆட்சியில் முக்கியத்துவம் அளிக்கப்பட்டு வருவதாகவும் பணியாளர்களுக்கு பயிற்சியாளர்கள் தமிழ் மற்றும் ஹிந்தி ஆகிய இரண்டு மொழிகளிலும் அறிவுரைகளை வழங்குவதாக கூறினார். மேட்டுப்பாளையம் சாலையில்  சாய்பாபா காலனி பகுதியில் கட்டப்பட்டு வரும் மேம்பாலம் ஏற்கனவே காலதாமதமான ஒன்று என்பதை குறிப்பிட்ட அவர் பெரும்பாலான மக்கள் கேட்டுக் கொண்டதற்கு இணங்க முதலில் மேம்பால பணிகள் நடைபெற்று வருவதாகவும் மேம்பாலத்தை விரிவாக்கம் செய்வது குறித்து டிசைன்கள் கேட்கப்பட்டுள்ளதாகவும் டிசைன்கள் வரும் பட்சத்தில் மேற்கொண்டு அதற்கான பணிகள் நடைபெறும் என தெரிவித்தார். மெட்ரோ விற்கும் பொதுப்பணித்துறைக்கும் சம்பந்தமில்லை என தெரிவித்த அவர் எனினும் அவர்களிடம் NOC வாங்கியே எங்கள் பணிகளை செய்வதாக கூறினார். அவிநாசி மேம்பாலம் விரிவாக்கம் குறித்து மதிப்பீடு தயார் செய்யப்பட்டு நிதி துறைக்கு அனுப்பி வைக்கப்பட்டுள்ளதாகவும்இந்த நிதி ஆண்டில் பணிகள் துவங்கி விடும் என கூறினார்.

தமிழ்நாட்டில் 66 ஆயிரம் கிலோமீட்டர் தூர சாலைகள் நெடுஞ்சாலை துறை கட்டுப்பாட்டில் இருப்பதாகவும் ஒரே ஆண்டில் அனைத்து பணிகளையும் செய்ய முடியாது எனவும் தெரிவித்த அவர் அவர்களின் பணிகளையும் எங்களின் பணிகளையும் கவனத்தில் கொண்டு மேற்கொண்டு வருவதாக தெரிவித்தார்.

காந்தி மண்டபத்தில் தலைவர்கள் உரிய மரியாதை தருவதில்லை என்று ஆளுநர் கூறி இருப்பது குறித்தான கேள்விக்கு பதில் அளித்த அமைச்சர், ஆளுநர் ஆளுநராக இருந்து பணியாற்றினால் மாநிலம் மக்கள் என அனைவருக்கும் சிறப்பு என்றும் ஆளுநர் அரசியல்வாதியாக மாறுகின்ற பொழுது உண்மையாக நாங்கள் எதை செய்தாலும் அதனை பாராட்ட மனம் இல்லாமல் ஏதாவது ஒரு குறை கூற வேண்டும் என்று ஆளுநர் கருதுவதாக பதிலளித்தார்.

இந்நிகழ்வில் கோவை மாவட்ட ஆட்சியர் மாநகராட்சி ஆணையாளர், மேயர் பொதுப்பணித்துறை அலுவலர்கள் உடன் இருந்தனர்.