கோவையில் நகைக்கடை அதிபரிடம் ரூ. 1.30 கோடி தங்கம் மற்றும் பணம் மோசடி

கோவையில் நகைக்கடை அதிபரிடம் ரூ. 1.30 கோடி தங்கம் மற்றும் பணம் மோசடி

published 1 year ago

கோவை

: கோவையில் நகைக்கடை அதிபரிடம் ரூ. 1.30 கோடி தங்கம் மற்றும் பணத்தை மோசடி செய்த ஏலச் சீட்டு கம்பெனி உரிமையாளரை போலீசார் கைது செய்தனர். கோவை செல்வபுரம் திருநகர் 2வது தெருவைச் சேர்ந்தவர் சிவக்குமார்(50). நகைக்கடை அதிபர். இவர் கடைவீதி காவல் நிலையத்தில் ஒரு புகார் அளித்தார். அந்த புகாரில் அவர் கூறியிருப்பதாவது:-

நான் கோவை செல்வபுரம் அசோக் நகரில் கடந்த 15 ஆண்டுகளுக்கும் மேலாக நகைக்கடை நடத்தி வருகிறேன். இந்நிலையில், நானும் கோவை வைசியாள் வீதியில் தங்க நகை சீட்டு ஏல கம்பெனி நடத்தி வரும் மகேஷ்பாபு(55) என்பவரும் 30 ஆண்டுகளாக நெருங்கிய நண்பர்களாகப் பழகிவந்தோம். இதனைத் தொடர்ந்து அவரது மகளுக்குக் கடந்த 2018ம் ஆண்டு திருமணம் நடைபெற்றது. அப்போது மகேஷ்பாபு என்னிடம் ரூ. 15 லட்சம் கடன் வாங்கினார். ரூ. 100க்கு 1 ரூபாய் வட்டி செலுத்தி வந்தார்.

இதற்கிடையே மகேஷ்பாபு என்னிடம் நான் நடத்தி வரும் எஸ்என்கேஆர் தங்க நகை ஏலச் சீட்டில் நல்ல லாபம் வருவதாகவும், நீயும் அதில் சேர்ந்து பணம் கட்டுமாறு தெரிவித்தார். அவரது ஆசை வார்த்தையை நம்பி கடந்த 2019ம் ஆண்டு பிப்ரவரி மாதம் முதல் 2021ம் ஆண்டு வரை அவரது ஏலச் சீட்டு கம்பெனியில் தங்கம் கொடுத்து வந்தேன். மாத, மாதம் 80 கிராம், 85 கிராம் வீதம் 1756 கிராம் சொக்கத் தங்கத்தைக் கொடுத்துள்ளேன்.

அதன் பின்னர் மகேஷ்பாபு லாபத்துடன் சேர்த்து 1900 கிராம் தங்கம் தருவதாக உறுதியளித்தார். ஆனால் அவர் கடந்த 2 ஆண்டுகளுக்கும் மேலாகியும், கடனாகப் பெற்ற ரூ. 15 லட்சம் மற்றும் 1900 கிராம் தங்கத்தைக் கொடுக்காமல் காலம் தாழ்த்தி வருகிறார். பலமுறை கேட்டும் எந்த பயனும் இல்லை. எனவே அவர் மீது உரிய நடவடிக்கை எடுத்து எனது பணம் மற்றும் தங்கத்தை மீட்டுத் தரவேண்டும்.

இவ்வாறு அவர் தனது புகார் மனுவில் தெரிவித்தனர். புகாரின் பேரில், கடைவீதி போலீசார் வழக்குப்பதிவு செய்து விசாரணை நடத்தினர். விசாரணையில், மகேஷ்பாபு ரூ. 1.30 கோடி மதிப்பிலான தங்கம் மற்றும் பணத்தை சிவக்குமாரிடம் வாங்கி மோசடி செய்தது தெரியவந்தது. இதனையடுத்து போலீசார் நம்பிக்கை மோசடி, ஏமாற்றுதல் ஆகிய பிரிவுகளின் கீழ் வழக்குப்பதிவு செய்து மகேஷ்பாபுவை நேற்று கைது செய்தனர். பின்னர் அவரை கோர்ட்டில் ஆஜர்படுத்தி சிறையில் அடைத்தனர்.