விபத்துகளை தடுக்க கோவை கணபதி - டெக்ஸ்டூல் பாலம் அருகே ரவுண்டானா

விபத்துகளை தடுக்க கோவை கணபதி - டெக்ஸ்டூல் பாலம் அருகே ரவுண்டானா

published 2 years ago

விபத்துகளை தடுக்க கோவை கணபதி - டெக்ஸ்டூல் பாலம் அருகே ரவுண்டானா

கோவை: கோவை காந்திபுரம் நஞ்சப்பா சாலை மேம்பாலம் மற்றும் கணபதி டெக்ஸ்டூல் பாலத்தில் தினசரி ஏராளமான வாகனங்கள் சென்று வருகின்றன.

நஞ்சப்பா சாலை பார்க் கேட் ரவுண்டானாவில் இருந்து உயர்மட்டப் பாலம் வழியாகவும், கீழ்ப்பகுதி வழியாகவும் கணபதி நோக்கி வரும் வாகனங்கள் பாலம் முடியும் பகுதியில் வலதுபுறம் திரும்பி காந்திபுரம் சாலைக்கு சென்று வந்தன.

இதற்கு சில அடி தூரம் தள்ளி கணபதி டெக்ஸ்டூல் மேம்பாலம் தொடங்குகிறது. நஞ்சப்பா சாலை மேம்பாலத்தின் கீழ்ப்பகுதியில் வரும் வாகனங்கள் காந்திபுரம் செல்லும் சாலைக்கு திரும்பும்போது, அதே மேம்பாலத்தின் மேலே கணபதி நோக்கி வரும் வாகனங்கள் மோதி விபத்துகள் ஏற்பட்டு வந்தன.

இதேபோன்று, லட்சுமி புரம் சந்திப்பில் டெக்ஸ்டூல் பாலத்தின் இறங்கு பகுதியிலும் விபத்துகள் ஏற்பட்டு வந்தன. இந்த விபத்துகளை தடுக்கவும், இரண்டு மேம்பாலங்களில் வரும் வாகனங்களின் வேகத்தை கட்டுப்படுத்தவும் தேவையான நடவடிக்கை எடுப்பது தொடர்பாக மாநகர போக்குவரத்து போலீஸ் துணை கமிஷனர் மதிவாணன், உதவி கமிஷனர் சரவணன் உள்ளிட்ட அதிகாரிகள் ஆய்வு நடத்தினர்.

இதுகுறித்து மாநகர போக்குவரத்து போலீஸ் அதிகாரிகள் கூறும்போது, நஞ்சப்பா சாலை உயர்மட்ட மேம்பாலத்தில் இருந்து இறங்கி, டெக்ஸ்டூல் பாலம் ஏறும் பகுதியில் சிமென்ட் தடுப்பான்களை கொண்டு சிறிய ரவுண்டானா அமைக்கப்பட்டுள்ளது.

இனி நஞ்சப்பா சாலை மேம்பாலத்தின் மேல்புற வழித்தடம், கீழ்புற தரை வழித்தடம் வழியாக வரும் வாகனங்கள் ரவுண்டானாவை சுற்றி காந்திபுரம் சாலையை நோக்கியோ, அங்குள்ள தனியார் ஆஸ்பத்திரி சாலையை நோக்கியோ செல்லலாம்.

டெக்ஸ்டூல் பாலத்தின் மேல்புற வழித்தடத்தில் இருந்து காந்திபுரம் நோக்கி வரும் வாகன டிரைவர்கள் கணபதி சாலைக்கோ, லட்சுமி புரத்துக்கோ செல்ல ரவுண்டானாவை சுற்றி செல்லலாம். இதனால் இப்பகுதியில் வாகன விபத்துகள் ஏற்படாது. சோதனை அடிப்படையில் இத்திட்டம் செயல்படுத்தப் பட்டு வருகிறது என்றனர்.