நகையைத் திருடி உல்லாசமாக சுற்றி வந்த நகைப் பட்டறை உரிமையாளர் கைது

கோவை: மேற்கு வங்கத்தைச் சேர்ந்தவர் சுஜித் மைட்டி (வயது 40). இவர் கடந்த 10 வருடங்களுக்கு முன்பு கோவை வந்தார். இங்கு செட்டி வீதிப் பகுதியில் தங்கி நகை பட்டறையில் தொழிலாளியாக வேலை செய்து வந்தார்.

பின்னர் அவர் சொந்தமாக நகைப்பட்டறை ஆரம்பித்தார். தொழிலாளியாக இருந்தபோது அவருக்கு பல பேரிடம்  தொழில் ரீதியான பழக்கம் ஏற்பட்டது. இதனால் சுஜித் மைட்டியிடம் பலர் தங்கக் கட்டிகளைக் கொடுத்து ஆபரணங்களாக மாற்றி வாங்கி வந்தனர். அவரின் நகை வடிவமைப்புத் திறன் அனைவரையும் கவர்ந்தது. இதனால் அவரிடம் ஆர்டர்கள் குவிந்தன.

கிலோ கணக்கான தங்கக் கட்டிகளை அவர் பெற்று ஆபரணங்களாக மாற்றிக் கொடுத்து வந்தார். இந்த நிலையில் கடந்த சில மாதங்களுக்கு முன்பு ஐ.பி.எல் கிரிக்கெட் தொடங்கியது. கிரிக்கெட்டில் ஆர்வம் கொண்ட சுஜித் மைட்டி அதில் பெட்டிங் (சூதாட்டம்) கட்டத் தொடங்கினார். ஆரம்பத்தில் அவருக்கு அதில் பணம் வரத் தொடங்கினாலும் பின்னர் அதில் அவர் லட்சக் கணக்கான பணத்தை இழக்கத் தொடங்கினார்.

இதற்காக அவர் பலரிடம் வாங்கிய நகைகளை செலவு செய்யத் தொடங்கினார். ஐ.பி.எல் சூதாட்டத்தில் இழந்த பணத்தை எவ்வாறாது விரைவில் மீட்க வேண்டும் என அவர் நினைத்தார். அதற்கு அவர் ஆன்லைன் சூதாட்டம் சிறந்த வழி என நினைத்து அதிலும் பணத்தை வாரி இறைத்தார். ஆனால் அதிலும் பணத்தை இழந்தார். நாளடைவில் அவரிடம் நகையைக் கொடுத்தவர்கள் திருப்பிக் கேட்கத் தொடங்கினர்.

இதனால் அவர் ஒருவரிடம் வாங்கிய நகையை மற்றவரிடம் கொடுத்து சில நாட்கள் சமாளித்து வந்தார். நாட்கள் செல்லச் செல்ல  நகை கொடுத்தவர்கள் அவரிடம் திருப்பிக் கேட்கத் தொடங்கினர். அப்போது அவர் தன்னிடமிருந்த 2 கிலோ தங்கத்தை எடுத்துக் கொண்டு தான் இழந்த பணத்திற்கு அதை வைத்து கொள்ள முடிவு செய்தார்.

கோவையில் இருந்தால் தன்னை விடமாட்டார்கள் என நினைத்த அவர் இங்கிருந்து நகையுடன் தப்பிச் செல்ல முடிவு செய்தார். முதற்கட்டமாக தனது மனைவி மற்றும் குழந்தைகளைக் கொல்கத்தாவிற்கு அனுப்பி வைத்தார். பின்னர் சுஜித் மைட்டி 2 கிலோ நகைகளுடன் இங்கிருந்து தப்பினார்.

தங்கக் கட்டிகளைக் கொடுத்தவர்கள் அவர் மாயமானதைக் கண்டு அதிர்ச்சி அடைந்தனர். இதுகுறித்து நகையைக் கொடுத்த வடவள்ளியைச் சேர்ந்த கனகராஜ், செட்டி வீதியைச் சேர்ந்த குருசாமி, டவுன்ஹால் பகுதியைச் சேர்ந்த  பிரகாஷ், ஜனா ஆகியோர் வெரைட்டி ஹால் காவல் நிலையம் மற்றும் பெரியகடை வீதி காவல் நிலையங்களில் புகார் அளித்தனர்.

2 கிலோ நகையைத் திருடிச் சென்ற சுஜித் மைட்டியைப் பிடிக்க காவல்துறை ஆணையர்  பாலகிருஷ்ணன் உத்தரவிட்டார். இதையடுத்து துணை ஆணையர்  மேற்பார்வையில், உதவி ஆணையர் மணிகண்டன் தலைமையில் பெரியகடை வீதி ஆய்வாளர் கண்ணையன், துணை-ஆய்வாளர் சிவக்குமார், சிறப்புத் தனிப்படை துணை-ஆய்வாளர் மாரிமுத்து, ஏட்டுக்கள் கார்த்தி, உமா, பூபதி ஆகியோர் சுஜித் மைட்டியைத் தேடி வந்தனர்.

அப்போது அவரது செல்போன் எண்ணைக் காட்டும் டவரை ஆய்வு செய்தனர். அதில் அவரது செல்போன் எண் காசி, வாரணாசி, நேபாளம் எனச் சுற்றி வந்தது. பின்னர் அவரது எண்ணைப் பின் தொடர முடியவில்லை. அவரைக் கண்டு பிடிக்கக் கோவையிலிருந்த அவரது உறவினரின் செல்போன் எண்ணைப் பின் தொடரக் காவல் துறையினர் முடிவு செய்தனர்.

உறவினரின் செல்போனை பின் தொடரந்த போது அவருக்கு சுஜித் மைட்டி புதிய செல்போன் எண் மூலம் டெல்லியிலிருந்து பேசியது தெரியவந்தது. உடனே காவல்துறையினர் அந்த எண்ணை வைத்து அவரைப் பிடிக்க முடிவு செய்தனர். அப்போது அவர் டெல்லியில் இருந்து கோவை வருவது தெரியவந்தது. காவல்துறையினர் அந்த எண்ணைக் கண்காணித்தனர்.

ரெயில் மூலம் சுஜித் மைட்டி கோவை வருவதை உறுதி செய்த காவல்துறையினர் ரெயில் நிலையத்தில் பொதுமக்களுடன் கலந்து அவரைப் பிடிக்கக் காத்திருந்தனர். ரெயிலிலிருந்து அவர் இறங்கியதும் காவல்துறையினர் அவரைத் சுற்றி வலைத்து மடக்கிப் பிடித்தனர்.

பின்னர் அவரை காவல் நிலையம் அழைத்துச் சென்று விசாரணை நடத்தினர். விசாரணையில் 2 கிலோ தங்கத்தில் அரைக் கிலோ தங்கத்தை அவர் ஆடம்பரமாக செலவு செய்தது தெரியவந்தது. அந்தப் பணத்தில் அவர் நட்சத்திர ஓட்டல்களில் தங்கி ஊரைச் சுற்றி வந்துள்ளார். பெண்களிடமும் உல்லாசமாக இருந்து வந்துள்ளார். 

இதையடுத்து காவல்துறையினர் அவரைக் கைது செய்து அவரிடமிருந்த 1½ கிலோ தங்கக் கட்டி மற்றும் 1500 பவுன் நகையைப் பறிமுதல் செய்தனர். பின்னர் அவரை நீதிமன்றத்தில் ஆஜர்படுத்தி சிறையில் அடைத்தனர்.