2.75 கோடி மோசடி- மலையாள பட தயாரிப்பாளர் கைது- கோவை போலிசார் நடவடிக்கை…

2.75 கோடி மோசடி- மலையாள பட தயாரிப்பாளர் கைது- கோவை போலிசார் நடவடிக்கை…

published 9 months ago

2.75 கோடி மோசடி- மலையாள பட தயாரிப்பாளர் கைது- கோவை போலிசார் நடவடிக்கை…

கோவை: கேரள மாநிலம் கொச்சியை சேர்ந்தவர் ஜானி தாமஸ்(65). மலையாள சினிமா பட தயாரிப்பாளர். இவர் மீது கோவை வடவள்ளி குருசாமி நகரை சேர்ந்தவர் துவாரக் உதய சங்கர் என்பவர் கோவை மாநகர குற்றப்பிரிவு போலீசில் புகார் அளித்தார்.

அதில் அவர் கூறியிருப்பதாவது:-
நான் தற்போது கனடாவில் வசித்து வருகிறேன். கடந்த 2016-ம் ஆண்டு, நான் கத்தாரில் பணியாற்றியபோது மலையாள திரைப்பட தயாரிப்பாளர் ஜானி தாமஸ், எனக்கு அறிமுகம் ஆனார். அப்போது அவர் 2 மலையாள சினிமா படங்களை தயாரிக்க போவதாக தெரிவித்தார். அந்த படங்களுக்கு முதலீடு செய்தால் நல்ல வருமானம் கிடைக்கும் என்றும் ஜானி தாமஸ் மற்றும் மகன் அவரது மகன் ரான் ஜானி ஆகியோர் தெரிவித்தனர். இதனை தொடர்ந்து நான் படத்தில் முதலீடு செய்ய விரும்பி ரூ.75 லட்சம் கொடுத்தேன்.

அதன்படி, அவர்கள் ‘நான்சென்ஸ்’ என்ற திரைப்படத்தின் படப்பிடிப்பை தொடங்கினர். தொடர்ந்து படத்தை முடிக்க மேலும் ரூ.2 கோடி கேட்டனர். நானும் ரூ.2 கோடியை கொடுத்தேன். அதன்பிறகு 2018-ம் ஆண்டு எனது பணத்தை திரும்ப கேட்டபோது படம் வெளியாவதில் தாமதம் ஏற்பட்டுள்ளதாக தெரிவித்து, ஜானி தாமஸ் எனக்கு ரூ.50 லட்சத்தை மட்டும் லாப தொகையாக கொடுத்தார். அதன்பின்னர் நான் கொடுத்த ரூ.2.75 கோடியை தராமல் காலம் தாழ்த்தி வந்தனர். இந்த பணத்தை நான் வடவள்ளியில் இருந்த போது பரிவர்த்தனை செய்ததால் கோவை மாநகர குற்றப்பிரிவு போலீசில் புகார் அளித்து உள்ளேன்.

ஜானி தாமஸ், அவருடைய மகன் ரான் ஜானி ஆகியோர் மீது நடவடிக்கை எடுத்து எனது பணத்தை மீட்டு தரவேண்டும்.

இவ்வாறு புகார் மனுவில் கூறியிருந்தார்.
புகாரின் பேரில், கோவை மாநகர குற்றப்பிரிவு போலீசார் ஜானி தாமஸ், அவருடைய மகன் ரான் ஜானி ஆகியோர் மீது வழக்குப்பதிவு செய்தனர். மேலும் அவர்கள் இருவரும் வெளிநாடு தப்பி செல்லாமல் இருக்க லுக் அவுட் நோட்டீஸ் வழங்கினர்.

இந்த நிலையில், ஜானிதாமஸ் நெடும்பாசேரி விமான நிலையத்தில் இருந்து வெளிநாடு தப்பி செல்ல முயன்றதாக தெரிகிறது. இதையறிந்த கொச்சி போலீசார் ஜானி தாமசை நேற்று முன்தினம் நெடும்பாசேரி விமான நிலையத்தில் பிடித்தனர். இதுகுறித்து அவர்கள் கோவை மாநகர குற்றப்பிரிவு போலீசாருக்கு தகவல் தெரிவித்தனர். போலீசார் அங்கு விரைந்து சென்று ஜானி தாமசை கைது செய்து விசாரித்து வருகின்றனர்.