கோவையில் தோழிக்கு லொக்கேஷன் அனுப்பி பேராசிரியரிடம் இருந்து தப்பிய இளம் பெண்!

கோவையில் தோழிக்கு லொக்கேஷன் அனுப்பி பேராசிரியரிடம் இருந்து தப்பிய இளம் பெண்!

published 1 week ago

கோவையில் தோழிக்கு லொக்கேஷன் அனுப்பி பேராசிரியரிடம் இருந்து தப்பிய இளம் பெண்!

கோவை: கோவையில் இளம்பெண்ணை பலாத்காரம் செய்ய முயன்ற கல்லூரி பேராசிரியரை போலீசார் கைது செய்தனர்.

திருப்பூர் மாவட்டத்தை சேர்ந்தவர் 25 வயது இளம்பெண், எம்எஸ்சி பட்டதாரி. இவர் கோவையில் தங்கி தனியார் நிறுவனத்தில் வேலை பார்த்தார். பின்னர் அந்த வேலையை விட்டு நின்று விட்டார்.

அந்த நிறுவனத்தினர் அவர் வேலைக்கு சேரும்போது அவரின் கல்வி சான்றிதழை வாங்கி உள்ளனர். வேலையை விட்டு நின்ற பின்பு அந்த சான்றிதழை கொடுக்க மறுத்ததாக தெரிகிறது. இதையடுத்து அவர் தான் கோவையில் கல்லூரியில் படிக்கும் போது தனக்கு வகுப்பு எடுத்த கல்வீரம்பாளையம் முருகன் நகர் நேரு தெருவை சேர்ந்த பேராசிரியர் சிவப்பிரகாசம் (45) என்பவரின் உதவியை நாடினார்.

தனது சான்றிதழை நிறுவனத்திடம் இருந்து வாங்கித்தருமாறு கேட்டு கொண்டார். இதைத்தொடர்ந்து சில நாட்களுக்கு முன்பு இளம்பெண்ணை தொடர்பு கொண்ட சிவபிரகாசம் சான்றிதழை வாங்கி வைத்துள்ளதாகவும், வேறொரு நிறுவனத்தில் வேலை வாங்கி தருவதாகவும் கோவைக்கு வருமாறு அழைத்தார்.

இதனை நம்பி அந்த இளம்பெண் நேற்று சிவப்பிரகாசம் வீட்டுக்கு சென்றார். வீட்டில் சிவப்பிரகாசம் தவிர வேறு யாருமில்லை. இருவரும் சிறிது நேரம் பேசி கொண்டிருந்தனர்.

அப்போது பேராசிரியர் சிவப்பிரகாசம் திடீரென இளம்பெண்ணை பாலியல் பலாத்காரம் செய்ய முயன்றார். அவரது பிடியில் இருந்து தப்பிய இளம்பெண் வீட்டின் குளியலறைக்குள் புகுந்து கொண்டார்.

பின்னர் செல்போனில் தனது தோழி ஒருவரை தொடர்புகொண்டு, விவரத்தை கூறினார். தொடர்ந்து தான் இருக்கும் இடத்தின் லொக்கேஷனை அனுப்பினார்.

அவரது தோழி இதனை காவல் கட்டுப்பாட்டு அறைக்கு அனுப்பி தகவல் கொடுத்தார். உடனே போலீசார் வடவள்ளி போலீசாருக்கு தகவல் கொடுத்தனர்.

போலீசார் லொகேஷனை வைத்து மாணவி இருக்கும் இடத்தை கண்டு பிடித்தனர். வீட்டுக்குள் சென்று குளியலறையில் இருந்த இளம்பெண்ணை மீட்டனர். தொடர்ந்து கல்லூரி பேராசிரியர் சிவப்பிரகாசத்தை கைது செய்து, கோவை மேற்கு அனைத்து மகளிர் காவல் நிலையத்தில் ஒப்படைத்தனர்.

போலீசார் பேராசிரியரிடமும், இளம் பெண்ணிடமும் தொடர்ந்து அவரிடம் விசாரித்து வருகின்றனர்.