கோவை ரயில் நிலையம் முன்பு செல்போன் பறிப்பு- போலீசாரை கண்டு தப்பி ஓடிய போது கீழே விழுந்து கை முறிவு…

கோவை ரயில் நிலையம் முன்பு செல்போன் பறிப்பு- போலீசாரை கண்டு தப்பி ஓடிய போது கீழே விழுந்து கை முறிவு…

published 1 day ago

கோவை ரயில் நிலையம் முன்பு செல்போன் பறிப்பு- போலீசாரை கண்டு தப்பி ஓடிய போது கீழே விழுந்து கை முறிவு…

கோவை: கிருஷ்ணகிரி மாவட்டம், ஊத்தங்கரை அருகே உள்ள சிங்காரப்பேட்டையைச் சேர்ந்தவர் செல்வம் கட்டிட தொழிலாளி. இவர் தனது மனைவி பழனியம்மாளுடன் கோவை அருகே உள்ள கருமத்தம்பட்டியில் தங்கி இருந்து கட்டிட வேலை செய்து வருகிறார்.

இவர் கட்டிட வேலை தொடர்பாக சுந்தராபுரத்தில் உள்ள ஒருவரை சந்தித்து விட்டு கோவை ரயில் நிலையம் வந்தார். பின்னர் அவர் நள்ளிரவில் அங்கு உள்ள மத்திய கூட்டுறவு வங்கி முன்பு நின்று செல்போன் பேசிக்கொண்டு இருந்தார். அப்பொழுது இருசக்கர வாகனத்தில் வந்த இரண்டு பேர் திடீரென செல்வம் கையில் இருந்த செல்போனை பறித்து விட்டு தப்பினர். உடனே செல்வம் அவர்களை துரத்தினார்.

அப்பொழுது இருசக்கர வாகனத்தில் பின்னால் இருந்த நபர் செல்வத்தின் கையைப் பிடித்துக் கொண்டு லங்கா கார்னர் பாலம் வரை தரதரவென இழுத்துச் சென்று தள்ளிவிட்டு தப்பிச் சென்றார். இது குறித்து உடனடியாக மாநகர காவல் துறை கட்டுப்பாட்டுறைக்கு தகவல் கொடுக்கப்பட்டது. அதன் பெயரில் காட்டூர் பகுதியில் உதவி ஆணையர் கணேஷ், ரத்தினபுரி இன்ஸ்பெக்டர் இப்ராஹிம் பாதுஷா மற்றும் போலீசார் அதிரடி சோதனை நடத்தினர்.

அதில் செல்வத்திடம் செல்போனை பறித்து சென்று நபர்கள் கவுண்டம்பாளையம் பகுதியில் பதுங்கி இருப்பது தெரிய வந்தது. இதை அடுத்து அங்கு போலீசார் உடனடியாக சென்றனர். போலீசாரை பார்த்ததும் அங்கு இருந்து இரண்டு வாலிபர்கள் தப்பி ஓடினர். இதை அடுத்து சந்தேகம் அடைந்த போலீசார் அந்த வாலிபர்களை துரத்தினர். அப்பொழுது அவர்கள் கீழே விழுந்ததில் அவர்களின் கைகள் முறிந்தன. இதை தொடர்ந்து போலீசார் அந்த இரண்டு பேரை மீட்டு அரசு மருத்துவமனையில் அனுமதித்தனர். பின்னர் அவர்களிடம் விசாரணை நடத்தப்பட்டது.

அதில் அவர்கள் கவுண்டம்பாளையம் பகுதியை சேர்ந்த ஆதித்யா, புண்ணிய சூர்யா என்பதும், செல்வத்திடம் செல்போனை பறித்துவிட்டு அவரை தரதரவென இழுத்துச் சென்று தள்ளிவிட்டு, தப்பி ஓடியவர்கள் என்பதும் தெரிய வந்தது. இதை அடுத்து இரண்டு பேரையும் காவல்துறையினர் கைது செய்தனர்.